افغان ولسمشر: ښځې به د سولې حدود مشخص کړي

د ولسمشر ټاکنو نوماند محمد اشرف غني نن دوشنبې (د زمري په ۱۴)د خپل ټاکنیز کمپاین پر مهال کابل کې د لویې جرګې تالار کې د ښځو یوې لویې غونډې ته په وینا کې وویل، د سولې خبرو کې به د ښځو پر حقوقو معامله و نه کړي.

هغه ژمنه کوی که بیا بریالی شي، حکومت کې به یې د ښځو ونډه زیاته کړي. او د ملي امنیت له شورا سره موازي د ښځو لپاره هم یوه شورا جوړه کړي.

ولسمشرۍ ته نوماند محمد اشرف غني وویل:«موږ د ښځو اقتصادي وړتیا او ښځو ته د فرصت رامنځته کول د بهرنۍ صدقې له لارې نه ووایوو، موږ کورني امکانات له اوبو نیولې د افغانستان تر اسمان پورې پراختیا ورکوو چې د افغانستان د ښځې په خدمت کې وي.»

ښاغلی غنی وايي، ولسمشرۍ ټاکنې به په خپل وخت وشي او هېڅوک نه‎شي کولای چې د افغانانو په برخلیک معامله وکړي.

افغان ولسمشر زیاته کړه:«ټولو نورو ټاکنیزو ډلو ته ووایئ چې راشئ او خپل پروګرامونه تشریح کړئ. که‎چېرې خبرې لرئ د دولت جوړونکي ډلې په څېر لږ تر لږه دېرش سلنه ژمنې چې موږ یې ستاسو لپاره کوو، که‎چېرې هغوی وکړې، هغوی ته ترجیح ورکړئ.»

دې غونډې ته راغلې زرګونه ښځې له محمد اشرف غني خپل ملاتړ اعلانوي.

د مشرانو جرګې غړې انارکلي هنریار وايي:«پنځه کاله وروسته، د هېواد لیرې پرتو سیمو کلیو، بانډو او هغه ځایونه چې ډېر لیرې دي ولاړ شو، د لیرې پرتو سیمو ښځو ته ډېر کارونه ترسره کړئ.»

د ښځو د حقوقو فعاله عارفه پیکار هم په دط اړه څرګندوي:«په مجلس کې د حاضرو ښځو په استازولۍ غواړم چې په راتلوونکې حکومت کې د ښځو حضور په ټاکنو کې د هغوی د ګډون په اندازه وي.»

د ولسمشرۍ ټاکنو د کمپاین له پیل سره سم تر اوسه شپږ نوماندانو خپلې ټاکنیزې غونډې کړي، خو دوولس نورو د ټاکنیزو منډو ترړو په اړه هېڅ خبر نه شته.